BACOLOD CITY – (2nd Update) Gilayon nga ginpasaka ang kaso nga motornapping kag robbery batuk sa mga suspek nga kaupod sang napatay nga notorious hold-up suspek nga si Johnny Villarete alyas JR sa diin subong nga adlaw gin-inquest na ini.
Nakilala ang suspek nga si Niño Abonales, 21 anyos ang edad, pumuluyo sang Purok Riverside, Brgy. Bata, Bacolod City.
Si Abonales ang kaupod ni Villarete kag sang isa pa gid ka suspek nga si Rustan Pecardal, 33 anyos kag pumuluyo man sang Brgy. Bata nga nagtuyo nga manghold-up kag magpang-motornap sa Maritime Police nga si PO2 Eric Pableo mga las 12:30 kahapon sang kaagahon sa C.L. Montelibano Drive, Brgy. Villamonte.
Sa amo nga insidente, napatay on the spot si Villarete matapos natiruhan sang pulis bangud ini ang nagbato gamit ang iya M-16 armalite nga ginabitbit apang sa ulihi natukiban nga replica.
Samtang natiruhan naman si Pecardal kag gindala sa ospital samtang si Abonales naman ang nakapalagyo gamit ang arkilado nga Mitsubishi Adventure.
Gilayon nga ginpatigayon ang pursuit operation gani madasig nga nadakpan si Abonales may mga las 9 kahapon sang aga kag gilayon nga ginpasaka ang kaso batuk sa iya.
Hugot nga ginapanginwala ni Abonales ang akusasyon kag nagsiling nga wala siya sang may nahibaluan sa amo nga krimen bangud nga gin-text gid lamang sia ni Villarete nga magkadto sa amo nga lugar kag sang iya pag-abot may naga tiniruhay na.
Si Abonales, ang may pilas man sa wala nga tiil matapos nga naagsikan sang natabo ang insedente sa diin ang detained karon sa custodial facility sang Police Station 4 samtang Pecardal ang gindala kaina sa Prosecutor’s Office nga gina-wheelchair ang ginsulod man sa karsel matapos gin-inquest.
