General Santos City— patay ang usa ka empleyado sa bangko human nga mibangga ang gimanihuang motorsiklo niini sa nakaparadang truck sa National Highway nga sakop sa Purok 3, Barangay Palian, Tupi, South Cotabato.
Biktima giilang si Roy Bale, 37, empleyado sa Land Bank of The Philippines nga nakabase sa Koronadal City.
Sa inisyal nga imbistigasyon sa Tupi PNP nasayran nga gikan kini sa syudad sa Koronadal ug pauli na sa ilang panimalay sa Purok Bagong silang, Barangay Palian, dihang iyang nabanggaan ang truck nga nakaparada daplin sa Dalan.
Sumala sa igsuon sa biktima nga si Ace Bali nga sila nakadawat nalang ug tawag bahin sa nahitabo sa iyang magulang kansa gidala sa usa ka balay tambalanan sa Koronadal apan human sa pila ka oras, nakabsan kini sa iyang kinabuhi.
Sumala pa ni Ace nga posibling gikapoy ang iyang magulang sa iyang trabaho mao nga wala gyud niya nabantayan ang nakaparadang sakyanan nga misangko sa pagbangga sa iyang motorsiklo.
Giangkon usab niini nga wala nagsul-ob ug helmet ang iyang igsuon dihang nahitabo ang insidenti. Nasayran nga grabing samad ang naangkon sa biktima sa iyang ulo nga bahin nga hinungdan sa iyang kamatayon.
