Makato, Aklan – Patay rong driver it motorsiklo matapos nga sinunggaban it ambulansya kainang agahon sa crossing Cajilo Makato, Aklan.
Nakilaea rong biktima kay Armenlo Tubang Taligatos, 58-anyos ag residente it nasambit nga barangay samtang rong driver it ambulansya hay nakilaea kay John Bautista, 58-anyos ag residente it Poblacion, Ibajay, Aklan.
Suno kay Police Staff Sergeant Jover Zubiaga it Makato PNP naga guwa sa andang imbestigasyon nga ro Mio Spoty nga ginasakyan it biktima hay halin sa Poblacion ag naga sunod rong ambulansya ko banwa it Ibajay apang pag-abot sa crossing Cajilo hay gulpi raya nga lumiko pa waea rason nga hasunggaban raya.
Matapos nga masunggaban hay inapok pa rong biktima bangud sa kabaskog kung impact.
Insigida mat-a nga gindaea it mga tawo nga una lugar rong biktima sa hospital pero gindeklara raya nga patay it doktor samtang ginabueong.
Samtang rong driver it ambulansya hay nag diretso man sa St. Gabriel Medical Center bangud nga may anang kargang pasyente nga biktima man it aksidente sa Ibajay ag dugang pa nga nahadlok imaw magpundo ay basi may pamilya ro biktima sa lugar ag alinon imaw.
Sa ginpatigayon pa gid nga pag follow up kung Makato PNP, ginpahayag kanda it driver kung ambulansya nga uwa nana matigayon nga malikawan rong motorsiklo bangud nga maeapit gidlang ro anang agwat ag may kasubeang.
Sa makaron hay una eon sa paghinakop it Makato PNP rong driver para sa nagakaigo nga disposisyon.
