photo by: Mdrrmo New Washington
New Washington, Aklan – Patay rong sangka scramble vendor matapos nga masunggaban it multicab samtang nagapungko sa motor it tricycle sa kilid it karsada kahapon it hapon sa Rizal St., Poblacion, New Washington, Aklan.
Ro biktima nakilaea kay Ernesto Nemis, 56-anyos ag residente man it nasambit nga lugar samtang rong driver it multicab hay nakilaea kay Bernard Ureta, sa legal nga edad ag residente it Brgy. Mabilo sa nasambit nga banwa.
Sa report nga matapos magpanghimos ro biktima it anang baligya ag nahakarga eon raya sa tricycle ag nagapungko sa motor nga ginahueat ro anang unga para mag maneho it tricycle hay gulpi eamang raya nga sinunggaban it multicab.
Sa kabaskog kung pagsunggab hay inapok rong biktima ag tumama raya sa kongkretong pader nga nakaangkon it lastro sa baba ag ueo.
Insigida nga gindaea sa sangka pribadong hospital rong biktima pero ginbawian raya it hueam nga kabuhi kainang aga-aga basi man sa kompermasyon it anang gumankon sa RMN DYKR Kalibo.
Nasayuran nga rong driver it multicab hay una sa impluwensya it makahililong nga ilimnon tag matabo rong aksidente.
Sa makaron hay kulong si Ureta sa lock up cell it New Washington PNP para sa nagakaigo nga disposisyon.
