Batan, Aklan – Patay rong back rider as ninahan rong driver it sangka motorsiklo matapos nga raya hay sumunggab sa oil tanker kahapon it hapon sa Brgy. Lalab, Batan, Aklan.
Rong namatay hay nakilaea kay Helnor Pelayo Dandoy, 32-anyos samtang rong driver hay si Arnel dela Cruz, 28-anyos mga residente it Sitio Pandan, Brgy. Bay-ang, Batan.
Sa report it Batan PNP, nga kahapon rayang si Helnor ag Arnel hay sakay it motorsiklo paadto sa Brgy. Morales, Balete para kunta magbisita si Helnor sa anang nobya.
May andang ginasundan nga daywa ka mga oil tanker ag nag-overtake. Tag sa tunga-tunga eon sanda napan-uhan ni Arnel nga may makasubeang sandang sangka aluminium van ag ana raya nga gin-iwasan ugaling na loose control ra imaw ag sumunggab sanda sa oil tanker.
Pagsunggab, inapok si Helnor ag tumama sa karsada ro anang ueo nga gintunaan it grabeng lastro ag pagkamatay, samtang si Arnel hay lastro sa tuhod.
Inapok man ro andang ginasakyang motorsiklo sa pihak nga lane nga nahapit pa it aluminium van.
Rong driver it oil tanker nakilaea kay Lolito Laira,45-anyos native it Butuan City ag temporaryo nga naga dayon sa Lapaz, Iloilo City.
Gin release mat-a dayon imaw it Batan PNP matapos rong imbestigasyon bangud nga nasayuran nga rong mga sakay it motorsiklo rong sumunggab sa tanker.
