Nabas, Aklan – Dead on arrival sa Ibajay District Hospital rong driver it motorsiklo matapos nga raya sumunggab sa tricycle kaina it agahon sa Poblacion, Nabas, Aklan.
Nakilaea rong namatay nga si Godofredo Saber Jr., sa legal nga edad, taga Buenasuerte ag may backrider nga si Skarwin Opanto, 20-anyos it Sibaguan, Roxas City, Capiz ag naga ubra sa peryahan samtang rong driver it tricycle nakilaea kay Ramero Tuang Tuang, 43-anyos nga taga Soledo ag may pasahero nga si Petrona Baliguat, 54-anyos it Alimbo, Baybay.
Suno kay PO2 Melvin Alba it Nabas PNP, nga rayang tricycle halin sa Brgy. Soledo paadto it Poblacion sa tindahan samtang rong motorsiklo halin sa Gibon paadto it Solido ag pag-abot sa may kubada nga parte it karsada ro motorsiklo hay nag overtake sa sangka van ag bangud blind curve uwa na eagi makita rong kasubeang nga tricycle ag sumunggab raya.
Nakaangkon it fatal nga lastro sa ueo rong driver it motorsiklo nga gintunaan ko anang insigidang kamatayon. Samtang ro driver it tricycle ag anang pasahero kamana man ro backrider it motorsiklo hay nakaangkon it man lastro sa eawas.
Si Baliguat ag Opanto hay gin transfer sa Kalibo matapos una nga raya nga gindaea man sa Ibajay District Hospital samtang rong driver it tricycle hay una man eon sa kustodiya it Nabas PNP para sa nagakaigo nga disposisyon kamana man ro mga imbolbadong saeakyan.
