Makato, Aklan – Uwa eon makaabot pa nga buhi sa hospital rong driver it motorsiklo matapos nga aksidenteng hasunggaban it ambulansya kabii sa national highway it Brgy. Mantiguib, Makato, Aklan.
Rong biktima nakilaea kay George Igcasenza, 39-anyos ag residente it nasambit nga lugar.
Base sa imbestigasyon it Makato PNP naga guwa nga rayang biktima hay naga drive it anang motorsiklo nga hilong halin sa Sitio Ilaya paadto it Sitio Centro apang pag-abot sa natabuan it aksidente hay uwa nana makontrol rong motorsiklo ag gulpi nga nagpatunga kung sa siin insakto man nga nagapaeangop rong ambulansya it banwang Malay nga gina maneho ni Doroteo Estilloso, 55- anyos, residente it Brgy. Cubay Norte, Malay nga may kargang pasyente paadto it hospital sa Kalibo.
Bangud sa kabaskog kung impact it pagkasunggab hay inapok pa paadto sa windshield it ambulansya rong biktima ag nahasagnoy pa.
Gintinguhaan pa nga madaea it mga taga MDRRMO Makato rong biktima pero gindeklara raya nga dead on arrival it doktor bangud sa fatal nga lastro sa ueo.
Samtang, nag surrender mat-a rong driver it ambulansya sa Makato PNP matapos ihatod rong anang kargang pasyente sa hospital para sa nagakaigong disposisyon.
