MOISES PADILLA – Salakyan nga Mitsubishi Strada ni Moises Padilla Vice-Mayor Ella Garcia-Yulo nga gin-impound matapos ang checkpoint sa Crossing Magallon sang nagligad nga tuig 2017, naaksidente kahapon (Marso 18) las 9 sang aga sa amu man nga barangay.
Ang amu nga salakyan ang ginamaneho sang bayaw ni anay Moises Padilla chief of police, SInsp. Allan Reloj nga ara confined sa Isabela District Hospital.
Ginaquestion sang pamilya Garcia paagi kay anay SB Member Marc Garcia ang paggamit sini bangod ini ang naimpound sang narecoveran ini sang mga ebedensya nga gingamit kontra sa ila kaangay sang armas kag mga ginasiling granada kag shabu.
Sa pagpangusisa sang dyHb, halin sa Bacolod ang Strada matapos nga may gindul-ong nga isa ka judge apang pagbalik naalang alang ini sa kurbada kag sang nagprino gulpi, amu nga nagliso ang salakyan kag nadulaan sang kontrol ang driver.
Ang driver isa ka katapo sang Barangay Peace Action Team ukon BPAT nga attached naman sa PNP apang wala sang lisensya.
Madugay na ini nga ginabawi kay Vice-Mayor Yulo apang wala ini natigayon nga mabalik, rasun nga sang nadakpan ginhingyo ini sang banwa sa korte nga irelease bangod kinahanglan sang banwa bangod ang Strada isa ka government vehicle.
Ginmando na ni PSSupt. Rodolfo Castil ang pag-usisa angot naman sa amu nga hitabo kag ginapa-explain ang Moises Padilla PNP sa reklamo sang pamilya Garcia.
