Kalibo, Aklan – Gin abandona sa prente it opisina kung LTO-Aklan rong sangka Nissan Pathfinder nga gina alegar gin karnap sa syudad it Passi, Iloilo.
Ro nasambit nga saeakyan hay nataeopangdan kaina it aga-aga ni PSSGT. Reniel Bartolome it HPG-Aklan samtang naga biyahe imaw paadto kunta sa syudad it Iloilo.
Suno kana nga anang napan-uhan rong naka illegally-parked nga saeakyan sa prente it LTO ag napanumdoman nana nga matsa rato rong saeakyan nga gin alarm kanda pinaagi sa viber nga gin karnap.
Ana nga ginbalikan, ag gintan-aw it uman kamana man gintan-aw nana rong picture sa viber ag sa post it RMN Iloilo ag naging positibo kung sa siin nagtawag imaw rayon sa tropa sa kampo.
Ginsaysay ni Bartoleme kon ano natabo sa saeakyan nga suno kana raya hay ginabaligya it tag-ana pinaagi sa online. May nag-adto nga uwa ma-identify nga persona nga nagtan-aw ko saeakyan sa baeay it tag-ana ag naghinyo nga i-test drive ag nagkompyansa man ro tag-ana.
Base sa impormasyon nga halin sa RMN Iloilo, kaibahan man rong tag-ana sa pag test drive pero samtang naga test drive sanda, nag pundo, nagpueopangutana ro kuno buyer kon siin paadto it Roxas City apang nagnaog it makadali ro tag-ana hasta nga pinadaeagan ro saeakyan ag uwa eon raya maibalik.
Ginpost raya nga naduea sa FB Page it RMN Iloilo ko Nobyembre 2 ag pagka Nobyembre 4 ginpablotter raya sa Passi City PNP.
Matapos nga ginpa blotter hay gin validate it HPG-Passi rong report ag matapos ma-validate hay gin viber raya sa bilog nga HPG-6.
Sa pag-usisa kaina ko saeakyan, uwa eon raya it plate number bangud nga ginkakas ag ginbutang sa sueod, ginkakas man ro anang running board ag pati ro anang baterya.
Gin ubra ni PSSGT. Bartolome nag usoy anay it mekaniko nga may sarang magamit nga baterya para mapaandar do nasambit nga saeakyan.
Sa makaron hay naha inform man eon it HPG-Aklan rong tag-ana nga si Ricky Pagayunan ag pati man rong HPG-Passi ag anda raya nga pagapadueongan. Ginpa rekord raya sa Kalibo PNP ag sa makaron ro nasambit nga saeakyan hay sa opisina na it HPG-Aklan.
Hasta sa makaron hay uwa pa it identity ko nasambit nga suspek ag padayon pa makaron rong follow up investigation it mga otoridad.
