Davao City – Gideklarang dead on arrival na sulod sa Camp Panacan Station Hospital ang opisyal sa Philippine Navy kinsa nibangga ang gimanehuang sakyanan sa usa ka trailer truck alas 4:20 sa kaadlawon niadtong Dominggo sa may KM. 20, Buhisan, Tibungco ning syudad sa Davao.
Giila ang biktima nga si Lt. Christun Louie Casintahan Olaivar, 37 anyos ug taga-Mars St., Zamboanga City.
Gihaya sulod sa Chapel sulod sa kampo sa Navy sa Panacan ang biktima.
Samtang padayong ginatambalan ang ang kauban niini nga si Capt. Virgel Amor Vallejos, 28 anyos ug residente sa Panacan ning syudad.
Sumala ni Bunawan PNP Station Commander Estrello Ramiso gikatakdang ipasang-at ang kasong Reckless in Prudence resulting in Homicide ug Physical Injury and Damage to Property batok sa drayber sa Sumifru International Harvester Truck nga si Joneth Galaura Balbuena, 21 anyos, taga- Centrala, Suralla, South Cotabato ugmang adlawa.
Base sa imbestigasyon sa mga awtoridad, giingong nagandam na unta ang trak nga muliko pasulod sa Sumifru Compound apan kalit lang mibangga sa likod nga bahin niini ang gidraybang Mitsubishi Adventure sa biktima nga gikan pa og Tagum City.
Usa sa mga gilantaw nga anggulo nga posibleng nakatulog ang biktima o nawad-an og preno ang gisakyan niini nga behikulo.
RadyoMaN Aimee Guinita
