Davao City – Gipahimangno sa City Government of Davao ang pagsunod sa minimum health and safety protocols partikular sa community pantries sa dakbayan nga ginadagsa sa mga tawo nga gustong mukuha sa available nga produkto.
Kini human nga gibutyag ni Davao City Mayor Sara Duterte-Carpio (sa interbyu sa city-owned radio) nga usa sa mga naga-organisa og community pantry sa syudad ang nagpositibo sa Coronavirus Disease 2019 (COVID-19) ug kritikal karon ang kahimtang sa ospital.
“One of the organizers of a certain community pantry diri sa atoa sa Davao City is already in the hospital, who is COVID-19 critical. Naa siya sa ICU (intensive care unit). Maka ingon gyod ‘ta nga dili safe ang distribution sa community pantries nato,” gibutyag sa alkalde.
Sa pagkakaron, ginasusi pa kung naggamit og Safe Davao QR (DQR) ang community pantry aron mahibal-an kung kinsa kadtong mga nahalubilo sa maong organizer.
Gipasalamatan ni Mayor Sara ang inisyatibo sa pagtabang sa publiko pinaagi sa community pantries apan angay nga masiguradong dili muhatod sa kadelikado sa katawhan panahon nga kini dagsaon ug pakyas na nga mapatuman ang minimum health standards.
Gisugyot na lamang ni Duterte-Carpio nga himuon ang contactless delivery sa ayuda ngadto sa mismong panimalay sa benepisyo aron nga malikayan ang mass gathering.
RadyoMaN Kirby Manzon
