Pagbawal sa pagligo sa usa ka sapa sa new bataan, giklaro sa management

Davao City – Gihatagan og katin-awan sa Ancestral Domain Management Office sa tribong Mandaya-Mansaka sa New Bataan, nga dili pa abli sa publiko ang usa ka sapa sa Shadol nga Sitio Libuton, Barangay Andap, New Bataan, Davao de Oro

Sa interview sa DXDC RMN Davao kang Ezequil Ligasan, Ancestral Domain Management Officer, iyahang gisaysay nga sukad nga nadiskobrehan ang maong lugar, ginadagsa na kini sa publiko lakip na sa mga vlogger. Gani, wala na nagapananghid ang mga mubisita sa area.

Giklaro sa management nga ang lugar ilawom sa ancestral domain, rason nga ilahang responsibilidad ang pagbawal sa mga mubisita sa lugar, diin nasayrang walay disiplina ang ubang nagaadto sa area, butang nga gika-alarma sa management.

“Pag-adto namo didto, dili ma-regulate ang maong lugar kay ang mga basura bisan asa nalang ibutang, ang mga bote. Mao to, taud-taud napud to, gi-close gyud na siya. Gibutangan og koral ang dalan dati,” saysay sa management.

Hinuon, gidugang sa tagdumala nga planong paligoan o ablihan sa publiko ang maong lugar karong tuiga (2024), apan kinahanglan pa nilang masiguradong maplastar ang sistema, lakip na dinhi ang pagbaton og permit gikan sa lokal nga panggamhanan.

RadyoMaN Kirby Manzon