Kalibo, Aklan – Madayon gid ro pagbukas it isla kung Boracay sa maabot nga buean it Oktubre.
Raya rong ginpahayag ni Atty. Richard Fabila it CENRO-Boracay sa pakikipag-angot it programang Straight-to-the-Point kung sa siin ginataeana sa Oktubre 15 ro pagbukas it isla para sa mga Aklanon ag sa Oktubre 26, ro opisyal nga pagbukas para sa tanan.
Suno kay Atty. Fabila nga rush makaron ro pagtrabaho sa mga karsada ag priority lane para nga makahingabot sa Oktubre 15.
May mga porsyon man eon nga tapos kapareho kung diversion road nga pwede eon maagyan pero rong karsada halin sa Cagban paadto it Balabag hay may porsyon pa nga indi mabuksan.
Bangod kara hay magabutang sanda it pontoon sa front beach kung sa siin idto temporaryo maga dungka ro mga ferryboat nga sakyan it mga bisita para nga indi eon mag agi sa karsada.
(Issuance it Permits)
Ginpahayag ni Atty. Fabila, nga kinahangean nga i-emplementar makaron sa mga hotel ag resorts nga nagapakamatig-a pa ko una rong “No permits, No Opening” policy.
Sa makaron hay masako rong mga tag ana it hotel ag mga resorts nga nagaproseso it andang papeles sa one stop shop.
(Sa mga naga trabaho sa isla)
Nagpadumdom si Atty. Fabila sa mga naga trabaho sa isla nga siguraduhon nga ro andang gina ubrahan hay may nagakaigo eon nga permits para makabalik ag maka resume sanda sa obra dahil basis a andang records hay mga una pa nga uwa it permit to operate.
May una suno kana nga probable nga maga open nga 384 pero 23 eamang rong nagpadayon sa pag proseso it anda nga mga permits ag raya man ro posible maka operate.
(Wet Lands)
Naga padayon sa gihapon rong clearing operations sa mga wet lands bangud uwa pa matapos ro iba pero bukon raya it upang sa nakataeana nga pagbukas kung Boracay bangud nga uwa man eon raya it naga okopa.
Stable man eon ro tubi sa palibot it Boracay mag eowas sa underground water nga hasta sa makaron hay nagapabilin gihapon nga contaminated ag bukon it advisable nga gamiton sa pag-eaha ukon imnun kon may deep well ro residente.
