Aron adunay kapas nga modumala sa panginabuhian nga ihatag sa gobyerno, gihingusgan karon sa kagamhanan local sa syudad ubos ni Mayor Oscar Moreno nga mahatagan sa insaktong edukasyon ang mga kanhi sakop sa New People’s Army nga boluntaryong mibalik sa gobyerno.
Kini ang gipadayag ni Allan Porcadilla, ang Focal Person sa Enhanced Comprehensive Local Integration Program kon E-CLIP atol sa gipahigayong medical and dental mission alang sa kanhi mga sakop sa NPA ug sa ilang mga pamilya sa Brgy. Mambuaya ning bag-o.
Gumikan niini, gipaubos sa literacy program ang mga kanhi rebelde lakip ang ilang pamilya aron mahatagan sa insaktong edukasyon, ilabina nga kini ang usa sa nag-unang programa ni Mayor Moreno ang paghatag maayong edukasyon sa mga kabataan.
Gipalig-on usab sa syudad ang programa sa E-CLIP aron ipabati kanila nga adunay gobyernong nag-atiman kanila ug sa ilang panginahanglanon.
Pinaagi sa paghatag mga serbisyo nga ilang gikinahanglan, dili na sila maghuna-huna pa sa paggbalik sa bukid.
