General Santos City–Giangkon karon ni Police Sr.Supt. Johnson Almazan ang Deputy Regional Director for Operation sa Police Regional Office-12 nga nakadawat sila ug intelligence report nga padayong nang-engganyo ug bag-ong mga myembro ang mga nabilin nga myembro sa Ansar Al Khilafa Philipphine (AKP) nga kanhing kanhing gipamunuan ni Muhammad Jaafar Maguid alias Kumander Tokboy Maguid.
Sumala pa ni Police Senior Supt. Almazan nga sa karon padayon ang ilahang paggukod sa mga nasangpit tungod kay kutob matud pa nga anaa ang ilahang presensya sa Sarangani Province magpabilin sila nga bahad sa siguridad sa kinatibuk-ang probinsya ug kasigbit nga mga dapit.
Dako matud pa ang posibilidad nga ipadayon sa mga nabilin nga myembro nga ang binuhatan sa ilahang lider bisan paman ug na apektohan sila sa pag kawala niini human kining namatay sa operasyon sa kapulisan sa Maasim pila ka bulan na ang nakalabay.
Dugang pa ni Almazan nga daku usab ang epekto sa maong grupo ang pagkasikop sa kapulisan sa gikaingong pag-umangkon ni Tokboy Maguid kansa usa sa mga gitumbok nga maoy musunod sa tunob sa iyang uyuan ug mahimong lider sa maong grupo. (Dave Silagan)
