Palong-siga sa sugang dagitab sa FIBECO, gipasabot; Electric Cooperative, nangayo og despensa sa mga konsumante

22
Gikasuko sa pipila ka mga miyembro konsumante ug tag-iya sa First Bukidnon Electric Cooperative (FIBECO) ang palong-siga nga supply sa kuryente sa pipila ka lugar sa Southern Bukidnon.

Nasayran nga sukad niadtong Hulyo 4, 2022, kada adlaw na makasinati og power interruption ang pipila ka lugar nga gi-serbisyuhan ilawom sa prangkisa sa FIBECO.

Sa interview sa RMN Malaybalay ngadto kang Armand Cantoy, ang tigpamaba sa FIBECO, gibutyag niini nga apektado sa maong unstable nga supply sa kuryente ang lungsod sa Quezon, pipila ka barangay sa Kitaotao, Don Carlos ug Maramag.

Matud ni Cantoy, kini tungod sa pagkaguba sa Camp 1 10 MVA substation nga nagsupply sa maong mga dapit.

Sigun ni Cantoy nga ang gihimo nilang dinalian nga sitwasyon karon mao ang pagtaod sa 5 MVA aron makasupplay og igo nga kuryente sa mga apektadong lugar.

Nasayran nga kung ilisdan diha-diha ang 10 MVA substation nga nadaut, gawas nga mulungtad pa kini og dugay, mugasto usab kini og halos P35 milyones.



Nasayran nga ang kuryente nga nagsupply sa maong mga apektadong lugar temporaryong naka-tap karon sa Anahawon 10MVA substation samtang gihulatan pa nga mataod ang 5MVA sa Camp 1.

Target karon sa FIBECO nga mahuman og taod ang 5MVA og usa ka semana apan tungod sa weather condition, madugay-dugayan pa kini.


Dungan niini, nangayo og despensa ang Fibeco sa mga miyembro konsumante ug tag-iya nga na-apektuhan.

Facebook Comments