Balete, Aklan— “Ginhampangan eamang ro baeatyagon”, raya ro emosyonal nga sintemyento it pamilya ni alyas “Atong” ro 26 anyos nga naghikog bangud sa paghigugma. Sa exclusive interview it RMN DYKR Kalibo sa 24 anyos nga manghod it biktima, ginpahayag kara nga ginhampangan eamang it menor de edad ro baeatyagon it anang magueang rason nga raya hay nagpakamatay. Suno kana nga nagpamaeayi sanda ku nagtaliwan nga buean it Agusto apang pilang domingo ro nakataliwan hay natukiban it biktima nga nakipag textmate raya sa ibang eaeaki ag gina alegar nga nakipag relasyon pa. Gindugang pa kara nga eubos ro pagpalangga ag tampad ro paghigugma it anang magueang sa nasambitan nga babaye apang raya pa ro ginhimo. Makakapilang beses eon suno kana nga nag hana nga magpakamatay ro biktima ku nagtaliwan nga domingo matapos matukiban ro masakit nga kamatuoran apang raya hay insigidang natabang. Ginkakibot eon lang it mga kaibahan sa farm nga anang gina-obrahan sa Brgy. Cortes Balete kahapon it agahon nga masapwan raya nga owa eon it kabuhi nga nakabitay sa rest house gamit ro kaeat. Sa pihak nga parte base sa exclusive interview it RMN news team sa babaye, ginpahayag kara nga nagtext pa ro biktima nga magapakamatay ku nagtaliwan nga gabie kung sa siin ana raya nga ginpamaeabagan. Aminado man raya nga nakaangkon imaw it mga textmate ag may mga naka chat sa social media kung sa siin may nakarelasyon man raya. Nasayuran nga pilang buean pa eamang ro andang relasyon ag nagplano eon nga magpakasae apang natabo ro pagpakamatay it eaeaki. #TatakRMN #RMNnewsExclusive
