Panaad sa NORDECO nga sulbaron ang power crisis sa Samal gilauman sa mga konsumante

Davao City – Malaumon ang mga konsumante sa Island Garden City of Samal nga tumanon sa NORDECO ang ilang saad nga masulbad na ang nasinatiang power crisis sa Samal karong bulan sa Hunyo.

Sumala ni City Councilor Sonny Lanorias nga misaad ang mga opisyal sa NORDECO nga mupalit og bag-ong generator set nga maoy magdugang og supply sa gikinahanglan elektrisidad sa tibook isla diin nagkulang kini sukad sa pagkadaot sa submarine cable.

Matud ni Lanorias, nga na-aprubahan na usab sa konseho ang pondo ingun man pagtugot kang Mayor Al David Uy nga mupalit ug laing generator set ang lokal nga kagamahanan aron muhatag ug dugang supply sa enerhiya.

Nagkanayon ang magbabalaod nga nagpadayon ang nasinatiang tag 10 ka oras nga power interruption ilabina sa mga hilit nga kabarangayan ug naapektuhan na usab ang sektor sa pamatigayon sa kakulang sa kuryente ilabina ang sektor sa turismo.

Gidugang sa opisyal nga masulbad lamang ang power crisis sa isla kung maka generate ug 10 megawatt nga supply sa kuryente ang NORDECO diin paigo na sa kasamtangang 9 megawatt nga power demand.

Kahinumduman nga niadtong bulan sa Pebrero gipaubos na sa state of calamity ang tibook isla tungod sa nisamot nga suliran sa kakulang sa elektrisidad nga miresulta sa tumang pag antus sa katawhan sa IGACOS.

RadyoMaN Erin Lumosbog