Pagahinyuon ni Pangueong Rodrigo Duterte sa kongreso nga tun-an rong pagpasa it hagnang laye nga magabawae sa pagbaligya it aeak pag-abot it alas 12:00 it tungang gabii.
Pagkatapos it anang ikap-at nga State of the Nation Address ginhambae it presidente nga pwedeng makapamayad-ayad it pagpangabuhi it mga Filipino apisar nakaapekto sa negosyo.
Dapat suno kana pag-abot it alas 11:00 it gabii uwa eot it naga inum it alak ag pauli eon sa baeay rong tanan.
Nagapati rong presidente nga malisud isueong ro nasambit nga hagna dahil maalma rong mga negosyante.
Pero sa Davao City suno kana hay nakasanayan eon raya it mga residente.
Samtang suno kay Senate Presidente Tito Sotto III nga kinahangean raya it maid-id nga pagtuon.
Suno kana nga pwede rong nasambit nga hagna sa ibang lugar pero indi pwede sa bilog nga nasyon.
Pwede raya nga maumpisahan pamaagi sa mga local ordinances.
Dugang pa ni Sotto nga pwede mang magpakuno-kuno rong pila ka mga establisyimento nga nakasarado pero puno it mga naga inuman sa sueod.
Kung epektibo sa Davao City ro nasambit nga hagna hay pwede man suno kana nga tu-an kung pwede raya nga ipatupad sa bilog nga nasyon.
