General Santos City—Samdan ang usa ka Melanie Rose Alejandro, 25 anyos nga taga Lanton, Barangay Apopong, Gensan human kining nalagpot sa gisakyan niining tricycle sa may corner South Osmiña Street ug Roxas Street, Barangay South Gensan alas 2:00 ang takna sa hapon, kagahapong adlawa.
Sa report nga nakuha sa RMN News team sa Dr. Jorge Royeca Hospital nasuta nga sakay ang biktima sa tricycle uban sa iyang igsuon paingon unta sa usa ka mall sa syudad apan pag abot sa lugar pagliko sa gisakyan niining tricycle nabangga kini sa van mao nga sila natakilid.
Nalagpot ang biktima nga hinungdan sa pag-angkon niini ug daghang mga samad sa lawas. Gidali ug dala sa ospital ang biktima aron nga mapailawom sa medikasyon, samtang ang driver sa tricycle nga gisakyan niini ang paspas nga misibat human sa insidenti.
Sa karon gipangita pa sa mga personahe sa Traffic Management unit ang driver sa tricycle kansa maoy sad-an sa maong insidenti.
