PASAKA spokesperson nga si Datu Tungig mi-surender sa militar

Davao City – Gikumpirmar ni Major Ronnel Legarde, CMO Officer sa 1003RD Brigade, 10th Infantry Division ang pagsurender ni Datu Tungig Mansumuy-at, spokesperson sa PASAKA ug ulahing bakwit IP leader nga mibiya sa UCCP Haran.

Sumala ni Major Legarde, nakahukom si Datu Tungig nga mubalik sa sabakan sa balaod tungod kay wala na siyay kadangpan nga alyadong grupo sa mga komunista sa kabukiran ilabina nga anam anam na nga nangabungkag ang mga Guerilla Fronts sa rebeldeng terorista.

Matud sa opisyal nga usa si Datu Tungig sa mga IP Leader nga nangumbinsi aron palugsungon dinhi syudad ang mga tribo sa Kapalong,Talaingod, Davao Del Norte aron magsilbing bakwit diha sa UCCP Haran sa pasangil nga military operation sa kabukiran.

Gidugang sa CMO Officer nga karong adlawa i-presentar sa kasundaluhan si Datu Tungig kang Davao del Norte Governor Edwin Jubahib pinaagi sa usa ka press conference sa kapitolyo sa Davao del Norte aron mahatagan og hinabang ang IP leader pinaagi sa mga programa sa kagamhanan.

RadyoMaN Erin Lumosbog