Pasyente sa Marawi nga gituohang adunay COVID, namatay, unom ka adlaw human namatay ang iyang igsuong PUI sa Iligan

45

Namatay niadtong Sabado sa buntag samtang naka-confine sa Amai Pakpak Medical Center sa Marawi City ang usa ka patient under investigation o PUI samtang naghulat sa resulta sa iyang COVID-19 test.

Matud pa ni Dr. Alinader Minalang, head sa Integrated Provincial Health Office (IPHO) sa Lanao del Sur, na-admit ang 45 anyos nga pasyente duha ka adlaw human mamatay ang iyang igsoong lalaki sa usa ka tambalanan sa Iligan City.


Gituohang namatay usab sa COVID ang maong igsoon kinsa gilubong sa usa ka quarry area nga gipanag-iyahan sa kagamhanang lokal sa Barangay Bonbonon ning dakbayan sa Iligan.

Dugang ni Minalang, ang duha ka mga namatay’ng managsoon aduna pay laing igsoon nga babaye kinsa na-admit sa Amai Pakpak niadtong Sabado sa hapon, pipila ka oras human mamatay ang 45 anyos nga igsoon.

Pulos sila naghulat sa resulta sa ilang COVID test.

Gikan sa Iligan City ang igsoong babaye, kauban ang su-od nga paryente, kinsa gidudahang adunay COVID tungod sa gipakitang mga simtomas.

Aduna pa silay usa ka igsoon nga COVID positive sa usa ka tambalanan sa Manila apan nagpaayo na kini matud pa ni Marawi Mayor Majul Gandamra.




Giklaro ni Minalang nga miuli ang managsoon sa Iligan City human gi-anunsiyo ang lockdown sa Metro Manila.

Sa ilang balay na sa Iligan, matud pa, sila hinay-hinay nga nakabati sa simtomas hangtud nga wala na nila ma-agwanta ug namatay sila.

Kung aduna man silay virus, posible matud pa nga ilaha kining nakuha sa ilang igsoong COVID patient sa Manila nga dunay travel historya nga gika’g China. 

Mga negosyante ang managsoon nga dunay puwesto sa Greenhills sa Metro Manila diin natala ang unang COVID positive sa Pilipinas. (Divina M. Suson, Marawi City, March 30)

Facebook Comments