BACOLOD CITY – Ginpasakaan na sang kaso sa City Prosecutors Office ang pinaka-una nga nag-violate sang Comelec gun ban.
Ang ginpasakaan sang kaso ginkilala kay Hermil June Flores, 26 anyos, residente sang Hda. Balabag, Brgy. Granada, Bacolod City.
Si Flores nadakapan sa ginpatigayon nga checkpoint sang Police Station 5 sang nagligad nga Lunes, January 14, 2019 las 5:45 sang hapon sa Abada Road, Hda. Teresita, Brgy. Granada.
Nakuha sa subject ang isa ka shotgun nga wala sang bala kon diin ini ang buot niya kuntani nga igabaligya.
Nahibaluan nga sa Western Visayas may pito na tanan ka violators sang gun ban humalin sang ini ang gin-implement sang nagligad nga Domingo, January 13.
Duha sa pito ka violators ang naghalin sa Negros Occidental, tatlo sa Iloilo kag tag-isa halin sa Bacolod City kag Capiz./dyHB BACOLOD
