Gilubong na ang patayng lawas ni PMA 4th Class Cadet Darwin Dormitorio kagahapon sa buntag sa Oro Gardens sa Barangay Lumbia ning syudad.
Lakip sa mga mihatag sa iyang mensahe alang kang Darwin, ang asawa ni DILG Sec. Eduardo Año nga si Joselyn Año nga lola ni Darwin Dormitorio.
Matud ni Mrs. Jean Joselyn Dioso Año, nga huna-hunaon na lamang niini nga lakip sa plano sa Ginoo ang nahitabo kang Darwin, aron dali alang sa pamilyang dawaton ang pagkamatay niini.
Samtang, gipaabot ni DILG Sec. Eduardo Año, nga walay white wash nga mahitabo sa imbestigasyon sa kapulisan ug naglaom nga mahunong ang hazing sulod sa akademya.
Lakip sa mihatag og mensahe ang girlfriend ni Darwin Dormitorio.
Gisuot sa mga anak niini ug higala ang puting sinina, lakip na ang pagpakita sa ilang panamilit kang Darwin Dormitorio.
Napuno usab sa mga bulaklak ang lubong ni Darwin Dormitorio.
Matud pa nga sa wala pa kini gidala sa Oro Gardens, mihimo una sa service ang Born Again Christian alang sa namatayng kadete.
