Nagapabilin pa makaron nga paealigban ro natabong pag-eopok it eogta sa Sitio Taban, Barangay Dalagsaan, Libacao, Aklan ko Byernes it gabi i mga bandang alas 10:00.
Suno kay Mayor Charito Navarosa it nasambit nga banwa, sa anang pagpangusisa sa mga residente, nakabati anay sanda it mabaskog nga pag-eopok bago napan-uhan nga ro tatlong ka baeay sa lugar inalsa it may kataason nga kapareho ko niyog.
Tag makita ko mga tawo nga ro andang baeay hay sa mataas eot-a insigida nga nagpaeanaog raya ag nag adto sa eowas nga lugar. Nakita man nanda ro eogta nga nagpaeanggiltak ag medyo bulkan rong pag porma nga kung sa siin may sapa sa kilid ag mainit ro tubi.
Insigida nga gin refer daya kung LGU-Libacao sa Phivolcs – Aklan ag sa PDRRMO-Aklan para nga maistodyohan.
Ginpakig-angotan man it DYKR RMN Kalibo rong Phivolcs – Aklan pinaagi kay Engr. Jo Arlu Sabar ag suno kana uwa it identified nga bulkan sa Aklan pero may fault line nga ginatawag Panay Fault Line kung sa siin maeapit sa lugar.
Suno mat-a kay Mr. Galo Ibardolasa it PDRRMC – Aklan hay anda man nga pagahueaton ro mga pictures halin sa mismong lugar pati rong mga coordinates para nga kung kinahang-ean nga i-refer sa region o sa Mines and Geosciences Bureau hay madali matumod.
Dugang ni Mayor Navarosa nga rayang lugar it Dalagsaan hay kapin 2 or 3 days bago maabot kung pagabaktason ag pila ka suba rong pagatabukon.
Bukon man suno kana it imposible nga basi may bulkan sa lugar bangud kon ro Mt. Pinatubo ro istoryahan hay uwa man raya ma identify nga bulkan ag gulpi malang man raya nga nagtubo ag eompok.
Kinahang-ean pa gid raya nga maistodyuhan suno kana it mga eksperto para ma klaruhan ag mataw-an it sabat ro mga espekulasyon it mga pumueoyo.
