BACOLOD CITY – (UPDATE) Lima ka mga witnesses ang gina-uyatan na karon sang mga utoridad angut sa natabo nga pagtiro kag pagpatay sa isa ka negosyante kag pagkasamad sang iya asawa may mg alas 8:30 kagab-i sa compound sang Redemptorist Church, BS Aquino Drive.
Ang biktima nga napatay nga ginkilala kay Alex Yao, 57 anyos kag ang iya asawa nga nasamaran nga ginkilala kay Maria Theresa Yao, 56 anyos, ang lunsay negosyante kag tag-iya sang isa ka foreign exchange sa Hilado Street.
Suno sa Police Station 2 apesar nga may mga tawo nga naka-kita sa krimen, sa gihapon blangko pa ang mga utoridad sa motibo sang krimen.
Nahibaluan nga ang mag-asawa ang nag-attend sa isa ka fellowship sa amo nga simbahan kon diin antes pa man sila nagsakay sa ila salakyan, naghatag pa ini sang kwarta sa mga kabataan nga nagapa-limos sa amo nga simbahan.
Sang yara na sa ila salakyan ang mga biktima kag sang hana na ini nga maglakat, nagpalapit ang suspek nga nagnaog halin sa motor, naka bonnet kag hinali na lamang nga gintiro ang mga biktima.
Si Yao ang nag-angkon sang duha ka igo sang bala sa iya wala nga dughan kag sa iya sag-ang, samtang ang asawa naman may igo sang bala sa iya palad sa wala nga kamot.
Tatlo ka empty shell sang calibre .45 nga armas ang na-recover sa crime scene.
Gindala sa Riverside Medical Center ang mag-asawa apang si Alex ang gindeklarar nga patay samtang ang iya asawa naman ang padayon karon nga ginabulong./dyHB BACOLOD
