Pulong Duterte mutabang sa pag-imbestiga sa TUPAD issue

61
Davao City – Nihimo na karon og lakang ang opisina ni Davao City 1st District Representative Paolo “Pulong” Duterte kabahin sa isyu sa Tulong Panghanapbuhay sa Ating Disadvantaged/Displaced Workers (TUPAD) program.

Sa official statement ni Congressman Pulong, gisaysay niini mamahimong makasohan og kriminal ang nagabuhat niini tungod kay kini pagpangawat sa panudlanan sa gobyerno ilabina karon nga anaa sa krisis ang nasud.

Gipasabot ni Duterte, dili tanan naka-avail sa programa rason nga angay kining trabahoan og tarong isip tabang usab sa gobyerno panahon sa kalisod.

“Niabot sa akoa nga adunay mga tao nga nalambigit sa pagpanlinlang sa atong gobyerno pinaagi sa TUPAD program sa DOLE. Masub-anun ko karon nga bisan paman sa kahago sa atong mga amigo sa DOLE, sa mga Brgy officials ug sa akong opisina, daghan mga tao ang wala makakuha sa benepisyo sa TUPAD tungod nga adunay pipila nga ni claim sa maka daghan nga higayun gamit ang daghan nga pangalan kada usa ka tao,” tipik sa iyang pamahayag.

Sa pagkakaron, nakig-alayon ang opisina kauban ang Department of Labor and Employment (DOLE) aron nga mailhan, mapanubag ug mahatagan og leksyon ang responsable sa maong insidente.

“Ang akong opisina ug ang opisina sa DOLE nihimu na ug lakang para madakpan ning mga tawhana…akong paningkamutan nga kining mga tawhana makabalo sa leksyon nga walay lugar sa atong syudad ang mga tawong dili kabalo magmahal sa iyang isig ka ingun.



Para sa mga tawong nalambigit ani, akong gipanghinaut nga nalipay mo sa inyung gibuhat ug nabusog mo sa inyung kinaon kay sigurado ako nga mas daghan ang nagutman tungod sa inyung binuhatan. Ang gaba dili magsaba busa hulata ninyu ang silut nga padulong sa inyo,” tipik sa iyang pamahayag.

Una niini, nakuhaan og video sa Barangay 3-A, Davao City ang mga TUPAD beneficiaries nga nagpaka aron ingnon nga nanilhig ug nanglimpyo apan igo lang diay nagpahulagway diin kini nag-viral sa social media ug miani’g batikos.

RadyoMaN Kirby Manzon

Facebook Comments