Davao City – Nibunok man ang ulan apan wala kini nahimong babag alang sa mga kahilagalaan ug pamilya sa 21 anyos nga Janilou Rosales usa sa biktima sa fatal road crash aron ilang mapabati ang ilang pagmahal ngadto sa dalagita atol sa ulahing kapahulayan niini sa Calinan Memorial Park.
Namatay si Janilou kauban usab ang iyahang bayaw nga si Melody Ann Sotelo Ybanez kaadlawon niadtong Mayo 31 human ma-overshoot ang ilahang sakyanan ngadto sa kasugat nga bus sa may Quimpo Boulevard.
Ang selebrasyon unta niini isip bag-uhay lamang nakalampos sa kolehiyo nisangpot sa usa ka trahedya nga nihugno sa kalibutan sa iyahang pamilya ug tanang nagmahal kaniya.
Usa ka malipayon, puno sa pangandoy ug lambing nga pagumangkon matud pa sa iyahang uyuan nga si Dante Simangan si Janilou.
Sakit man dawaton alang sa ilahang pamilya ang sayo nga pagbiya ni Janilou apan nagpabiling silang lig-on ug gisalig sa Ginoo ang tanan.
Sa pakighinabi usab sa DXDC ngadto sa mga suod nga mga higala sa dalaga dili nila malimtan ang pagkamapalanggaon, matinud-anon ug Diyosnon usab kini.
Matud pa nila nga magsilbi gayod si Janilou nga ilahang inspirasyon ug nawala man siya dinhi sa kalibutan apan magpagbilin kini siya sa ilahang mga kinabuhi ug kasing-kasing.
Samtang, ibyahe ngadto sa General Santos City ang patayng lawas sa bayaw ni Janilou nga si Melody ug didto na usab kini ilubong.
RadyoMaN Aimee Guinita
