[Update] Roxas City, Capiz – Nagapangatubang na sang kaso nga Reckless Imprudence resulting in Multiple Homicide sa Roxas City Prosecutor’s Office ang Indian National nga si Gurparkash “Happy” Singh nga ginatudlo driver sang itom nga Mitsubishi Mirage nga nadisgrasya sa People’s Park, Barangay Baybay, Roxas City kag nagresulta sa kamatayon sang apat ka mga persona nga sakay sa nasambit nga salakyan.
Nahibaluan nga ang mga himata sang mga biktima ang nagatindog nga complainants batuk sa nasambit nga Indian National. Ang nasambit nga kaso ang suportado man sang apat ka mga affidavit sang mga himata kag duha pa gid ka mga affidavit sang duha ka mga testigo. Sa madumduman nga nakatigayon nga makabiya sa Capiz si Singh antes napasaka ang kaso.
Nagluntad ang insidente sadtong kaagahon sang Nobyembre 7, 2017 kun sa diin ginbawian sang kabuhi ang apat ka mga persona samtang duha pilason matapos nagbunggo ang isa ka salakyan sa tatlo ka puno sang lubi (niyog) sa People’s Park, Barangay Baybay, Roxas City.
Dead-on-arrival sang gindangat sa ospital sanday Bryan Macalintal residente sang Sitio Nipa, Barangay Culasi, Jomer Baes kag Patrick James Llave sang Barangay Tanque kag John Bert Ching Go sang Fuentes Subdivision, Roxas City. Samtang gindala sa ospital si Joy Felarca Gico sang Barangay Dolores, Dumalag, Capiz kag ang ginatudlo nga driver nga si Happy Singh.
Suno sa report, madasig ang pagpadalagan sang nasambit nga salakyan rason nga nagbunggo ini sa tatlo ka puno sang lubi sa kurbadahon nga bahin sang karsada sa People’s Park. Nahibaluan nga nagikan sa balay-ilimnan sa city proper ang nasambit nga mga biktima antes nagpadulong sa Brgy.Baybay. kag ginapatihan nga yara sa impluwensya sang makahulubog nga ilimnon ang mga biktima.
