Rehiyon onse dili makulangan og suplay sa bugas

Davao City – Gipaniguro karon sa Department of Agriculture Davao Region nga dili makulangan og suplay sa bugas ang entero rehiyon onse luyo sa masinati nga tinghuwaw nga posibleng molungtad hangtud sa 1st quarter sunod tuig, kini subay sa unang deklarasyon sa buhatan sa PAGASA sa miaging buwan.

Sumala ni DA XI Rice Price Monitoring Focal Person Alex Sibuan nga dunay igong suplay sa bugas ang Davao Region sanglit kasamtangang nagpadayon ang pag-ani karon sa mga mag-uuma sa ilang kahumayan ning panahona.

Segun ni Sibuan nga gawas sa ting-ani karon, ang rehiyon onse naga-angkat sab og suplay gikan laing rehiyon sama sa Caraga Region, South Cotabato, ug uban pang silingang rehiyon.

Suma ni Sibuan nga mas bastante pa gyod ang rice supply sa rehiyon tungod gawas sa local supply, aduna sa’y suplay gina-angkat gikan sa mga silingang nasod sa asya sama sa Vietnam.

Wala matud pa maapektohi sa summer season ang uma sa kahumayan sa rehiyon ug gani kamatooran niini mas dako ang produksyon karong tuiga itandi sa wet season sa buwan sa November sa nakalabay’ng tuig.

Samtang pikas bahin, namatikdan sa DA XI ang pagsaka og P1 ang presyo sa retail price sa matag kilo sa bugas.

Una nang gikabalak-an sa katawhan ang dakong posibilidad nga mag-usbaw og P5 ang matag kilo sa bugas sa sunod nga mga adlaw ning kasamtangang tuig.

RadyoMaN Joel Viray