Kalibo, Aklan – Nag-abot eon sa 285 nga hotel ag resort rong ginpahinugutang makapag-operate sa isla it Boracay.
Raya hay matapos nga taw-an it akreditasyon it Boracay Inter-Agency Task Force rong dugang pang 6 nga establisyemento para magbaton it bisita.
Sa makaron, sa datos it Department of Tourism (DOT) may kabilugang 10,076 nga kwarto rong pwedeng magbaton it bookings & reservations sa Boracay.
Ko nagtaliwan nga buean, may 279 eamang nga hotel & resort rong pwedeng magbaton it bisita.
Samtang, nagpaandam rong DOT sa mga bukon it accredited nga hotel & resort sa isla nga padayong naga baton it bookings & reservation ag nagabutang pa it online promotions.
Padumdom it ahensya, kung mapamatud-an hay pwedeng dayunang ipasara rong establisyemento ag magapangatubang it reklamo rong tag-ana.
Kung matandaan, ginsara sa sueod it an-um nga buean umpisa Abril 26 hasta Oktubre 26 makaron nga dag-on rong isla matapos ginmado ni Pangueong Rodrigo Duterte para taw-an it daean rong paglimpyo ag rehabilitasyon sa isla it Boracay.
