Davao City – Laing hugna sa ‘Oplan Kandado’ ang gikasa sa Bureau of Internal Revenue 11 (BIR-XI) kagabii.
Temporaryong gipasirad-an ang Golden Dragon Restaurant Ktv & Bar sa may dalang Sobrecary Cor. Monteverde ning syudad sa Davao.
Segun ni Rodrigo Rivamonte, Revenue District Officer sa BIR Davao, wala nagdeklara og sakto nga buhis ang maong bar.
Nadiskobrehan atol sa gihimong surveilance sa mga personahe sa BIR nga 75.82% sa 2016 ug 73.81% sa 2017 gikan sa kinatibuk-ang halin ang wala gideklara sa maong establisiemento.
Gawas usab niini nasakpan usab nga adunay mga anomaliya sa ilang mga mga resibo.
“It would appear here that there is a P23.7M deficient, undeclared sales for 2016 and for the first two quarters of 2017 is roughly about P16M,” sumala ni Rivamonte.
Subling gipasidad-an sa BIR-XI ang mga negosyante nga magbayad og saktong buhis.
Gipaklaro ni Rivamonte nga dili nila buot magpasirado na pod og negosyo ang ilang buhatan apan kinahanglan nga ang mga tagdumala kahibalo sa ilang mga obligasyon og dapat tama ang pagbayad og tax.
“Para malikayan natong tanan between the taxpaying public, taxpaying nga mga negosyante dinhi sa Davao ug sa BIR, kami mismo nagahangyo nga kung pwedi aduna tay substantial compliance of the various tax laws para dili ta muabot sa ingon ani nga punto,” sumala ni Rivamonte.
Makabalik na sa ilang operasyon karong adlawa ang maong pamatigayon human nga gibayaran na nila ang kantidad nga P1.5M nga 110% sa Basic VAT nga requirement kanila sa BIR aron makaoperate sila og balik.
Kini maoy gikumpirmar sa operations manager nga si Ritchie Sabrine sa mga tigbalita.
RadyoMaN Aimee Guinita
