Davao City – Adunay igong katarongan aron magdeklara og ‘revolutionary war’ si Pres. Rodrigo Duterte batok sa mga tawo nga musuway og sabotahe sa iyang panggobyerno pinaagi sa pagsamok-samok.
Gibutyag ni Mindanao Peoples Caucus Convenor Candido Aparece nga dunay igong rason ang pangulo sa pagdeklara og ‘revolutionary war’ aron lutuson ang mga tawo nga mupahugno sa iyang kagamhanan.
Kahinumduman nga gipamahayag ni Sen. Franklin Drilon nga maghinay-hinay ang kagamhanan sa pag-review sa mga kontrata tungod sa kabalaka nga basin masumbalikan ang nasud.
Ang pamahayag ni Drilon gikasakit sa presidente maong nagbahad kini nga iyang i-suspindi ang ‘privilege of habeas corpus,’ dakpon ug presohon ang musanta sa kalamboan sa nasud.
Segun ni Aparece, ang gikinahanglan sa pangulo karon mao ang dugang gahum aron iyang mabuhat ang kausaban ug kalamboan nga gisungag og maayo karon sa opposition.
Bugtong ‘puthaw nga kamot’ lamang sa presidente ang makatumpag sa oposisyon ug sa ilang kaalyadong mga grupo kansang misyon mao ang pagpahagsa sa gobyerno.
Gikalabak-an ni Drilon nga basin masilip ang anomaliya sa mga kontrata nga gisudlan sa miagi nga administrasyon maong nangugat gyud ang senador sa pagsupak sa pagreview sa mga kontrata.
Uyon si Aparece sa laraw nga i-suspindi ang ‘writ of habeas corpus’ aron sa ingon walay sango sa legal nga aspeto ang pagsikop sa mga kritiko kinsa tataw nga wala malipay nga usa ka bisdak ang nahimong pangulo sa nasud karong mga panahona.
Apan ang majority sa mga Pilipino namahayag nga mas maayo ilahos na sa ‘Revolutionary Government’ inay ‘revolutionary war’ lamang aron wala na’y makapugong sa kabag-ohan nga gipangandoy sa kadaghanan nga maoy hingpit muputol sa ugat sa mga oligarch nga giprotektahan sa mga kaalyado ni Cory Aquino.
RadyoMaN Joel Viray
