Sa interview sa DXDC RMN Davao kang PLtCol. Florante Retes, Officer-In-Charge sa Digos City PS, iyang gibutyag nga na-involve sa aksidente ang tulo ka sakyanan nga mao ang FUEL TANKER nga gimaneho ni Noel Testado, 35 anyos, taga Midsayap, North Cotabato, COMMUTER VAN nga gimaneho ni Roy Elegino, 59 anyos, taga Pikit, North Cotabato, ug MOTOR nga gimaneho ni Jeffrey Nuñez,48 anyos, taga Pier Uno, Colorado, Digos City, Davao del Sur.
Saysay ni Retes biyahe padulong Bansalan ang motor samtang padulong Digos City ang tanker truck ug van sa dihang naalanganin sa pag-overtake ang van sa tanker truck.
“Na-short siguro og overtake (ang van), naigo iyang lubot sa ulo sa tanker. Mao ‘toy cause sa pagtuyok niya. Pagtuyok niya, naigo niya ang motor. Mao ‘toy gikamatay sa nag-drive sa motor nga kasugat nila,” saysay sa pulis.
Matud sa police official nga dead on the spot ang rider nga Nuñez human kini nga napasok sa unahan nga bahin sa tanker truck, samtang samaran usab ang 9 ka pasahero sa van nga daling gidala sa ospital.
Sa pagkakaron, gikustodiya na sa Digos City PS ang driver sa tanker ug van. Wala pa usay desisyon kung unsa ang mamahimong kasabutan o settlement sa matag kampo.
RadyoMaN Kirby Manzon
