HINIGARAN, NEGROS OCCIDENTAL – Dead on arrival ang isa ka biktima sang shooting incident nga natabo sini gid lamang nga kaagahon sa highway sang Rizal Street, Brgy. Pilar banwa sang Hinigaran.
Nakilala ang biktima nga si Jonie Noli, 49 anyos ang edad, kasado kag pumuluyo sang Purok Magnolia, Brgy. 7, Bacolod City.
Base sa pagpangusisa sang Hinigaran NP, mga la 1:10 sini gid lamang nga kaagahon, durante nga nagasakay sa tricycle ang biktima, upod ang iya asawa nga si Hazel Noli, 48 anyos ang edad kag buot na kuntani nga magpauli, may nag-iping sa ila nga motor.
Isa sa sakay sang mga wala nakilala nga riding in tandem ang nagtaya sa biktima, gintiro ini kag naigo sa iya tuo nga dughan kag sa idalum nga bahin sang tuo niya nga tiyan.
Gilayon naman nga nagpalagyo sa wala nahibaluan nga direksyon ang suspek nga riding in tandem.
Dali-dali nga gindala sa Hinigaran Emergency Clinic ang biktima apang ini ang gin-declare nga DOA sang attending physician nga si Dr. Leizel Lizades./dyHB BACOLOD
