Dangtan sa dimalas sa kamatayon ang suspek nga giilang si Nobert Pudy Alvarando, hamtang ang pangidaron, ug nagpuyo sa Isla sa Samal.
Nadala pa sa Southern Philippines Medical Center si Alvarando apan wa’y swerte kay gideklara kining dead-on-arrival sa doktor nga mihiling kaniya gumikan sa samad sa pinusilan nga natilawan niini sa iyang kalawasan.
Suma ni Police Major Bernie Suaga, Hepe sa Buhangin PNP, nakuhaan pa og tulo ka pakete sa gitohoang shabu nga mukantidad og 3,500 ka pesos, punto 45 nga pistola ug uban pa sa mga sakop sa Scene of the Crime Operatives XI atol sa paghiling sa kalawasan sa suspek sulod sa premises sa SPMC.
Nasayran nga nataymingan sa mga kapulisan nga nagpatrolya niadtong panahona sa lugar ang suspek nga mikatkat og miambak sa pader gikan sa sulod sa maong subdivision ang suspek hinungdan nga wala maglangan ang mga otoridad sa pagsita aron pasurenderon.
Apan imbis nga mutahan sa malinawon nga paagi mibunlot matud pa og pistola ang suspek dayon pamusil ngadto sa mga pulis busa mibawos usab og pusil ang mga otoridad nga nagresulta sa kamatayon sa suspek.
Ang patay’ng lawas ni Alvarando anaa karon sa morgue sa SPMC.
RadyoMaN Joel Viray
