Minor gi-hostage sa dunay deperensya sa pangisip

Davao City – Bisan paman og gidala sa Institute of Psychiatry and Behavioral Medicine (IPBM) sa SPMC ang hostage taker, gihikay gihapon sa Bunawan Police Station ang kasong Kidnapping and Serious Illegal Detention ubos sa Article 267 Revised Penal Code aron isang-at sa piskalya batok kang alyas Niko nga nagpuyo sa Tibungco ning siyudad.

Gidala sa IPBM ang suspek tungod sa gipakitang abnormalidad sa pangisip ug aron masusi sa mga psychiatrist ang kondisyon sa pangutok sa dinakpan.

Nasuta nga bandang 11:00 sa sayong kaudtuhon kagahapon adlawa, kalit nga misulod sa piso net sa maong lugar ang suspek ug kalit gibitad ang 9 anyos nga batang babaye ug gidala sa panimay ni Lolita Alce ug milahos sa kwarto ug dayon gilakan kauban ang bata.

Armado og duha ka kutsilyo ang suspek diin paspas usab nakaresponde ang mga sakop sa Bunawan PNP sa pagpanguna ni Police Lieutenant Dante Espejon, SWAT Team sa pagpangulo ni Major Dante Baguio, BFP, 911 paramedic team.

Miabot og usa ka oras ang negosasyon ayha nakonbinsir ang suspek nga buhian ang hostage niini ug dihang nakalugar na ang kapulisan gilayon gipusasan ang suspek ug nakuha gikan kaniya ang mga kutsilyo nga gigamit sa pagpunting sa biktima.

Hinuon, luwas ug wala masamdi sa suspek ang biktima nga hayan ipailawom sa counseling gumikan sa trauma nga nasinati niini hatud sa hostage taking nga nahitabo sa bata.

RadyoMaN Joel Viray