Davao City – Nagsugod na ang pay out sa Social Amelioration Program (SAP) 2nd tranche dinhi sa Davao City.
Sumala ni Merlinda Paragamac, Department of Social Welfare and Development kun DSWD XI Assistant Regional Director atol sa interview kaniya sa programang Serbisyong Straight to the Point sa DXDC RMN Davao, nasugdan na matud pa ang pay out sa mga andam na nga datos pinaagi sa direct pay out ug digital payment.
“Kining 2nd tranche (SAP) sa Davao City in fact naa nay tay barangays nga natagaan through direct payout… Digital payment ug direct pay out but majority are on digital payment… nag-engage ta og partner nga finance service provider, Starpay ang pangalan,” segun ni Paragamac.
Dugang niini, gipahinumduman ni Paragamac ang mga benepisyaryo nga og dunay pangutana o klaripikasyon mahitungod sa nahisgutan, mamahimong muadto sa barangay.
Ang SAP maoy gipahimutang nga programa sa gobyerno isip ayuda sa mga naapektuhan sa COVID-19 pandemic.
RadyoMaN Renz Barbarona
