South Cotabato– Usa ang sikop samtang nakasibat ang duha ka mga suspek sa gilusad nga search operation sa Sitio Bagong Sikat, Barangay Tinongcop, sa Tantangan South Cotabato niadtong milabayng adlaw , alas 3:00 ang takna sa kabuntagon.
Giila ang nasikop nga si Jose Alidin samtang ang duruha ka igsoon niini nga nakaikyas giila sab nga sila Guinid Alidin ug Gani Alidin nga parehong residente sa nasampit nga lugar.
Nakuha kang Jose ang lima ka pakete sa gituohang shabu ug liso sa marijuana samtang sa balay sa igsoon nga si Gani nakuha ang kalibre 38 nga pusil ug upat ka bala ug homemade Jolen gun ug Granada. Samtang nakuha usab ang 12 gauge shot gun nga dunay magazine ug homemade 12 gauge short fire arm rifle ug marijuana sa balay sa igsoon niining si Guinid.
Sumala kay Police Senior Inspector Bagut sa Tantangan, Municipal Police Station kining tulo ka mag igsoong target sa search operation human nakaabot ang impormasyon ngadto kanila bahin sa ilang iligal nga aktibidad.
Samtang base usab sa impormasyon, sukad kini niabot sa ilang lugar sigig panghadlok ang mga nasampit sa mga nagpuyo ug mga mag-uuma sa maong dapit.
Sa karon padayon pang gipangita sa kapulisan ang duruha ka nakaikyas nga suspek samtang gipasakaan na usab sila ug kaso kalabutan sa kalapasan sa RA 9165 ug RA 1095 (Raven Joy S. Bucio).
