South Cotabato–Andam na ang preparasyon sa kapulisan sa South Cotabato alang sa seguridad sa lugar sa nagkaduol nga T’nalak Festival kung asa gilauman nang daan sa otoridad nga dagsaon sa katawhan ang maong festival.
Sumala pa ni Police Senior Superintendent Joel Limson ang Provincial Director sa South Cotabato Police Provincial Office nga walay angayang kabalak-an ang mga tawo nga mutambong sa maong selebrasyon gumikan kay dunay magbantay nga mga pulis sa matag lugar nga dunay mga aktibidadis nga gipahigayon aron masiguro nga dili malutsan sa mga dautang elemento nga walay laing tinguha kundili ang muhatag lang ug kasamok sa lugar.
Saysay man usa sa opisyal nga dili lang ang mga local police station sa South Cotabato ang magbantay sa lugar kundili duna poy idugang nga pwersa nga gikan pa sa Regional Office.
Nanawagan usab ang opisyal sa katawhan nga tabangan sila sa pagbantay sa lugar ug mamahimong alerto sa palibot nga kung duna silay namatikdan nga kaduda-duhang lihok sa tawo ug mga butang nga makit-an sa lugar mamahimo gilayong i-report sa kapulisan aron mahatagan ug aksyon ang maong sumbong. (Reynald Timario)
