BACOLOD CITY – Lunsay naglanding sa ospital ang isa ka security guard kag ang isa ka driver sang traysikol sa natabo nga shooting incident may mga las 8:30 sini gid lamang nga aga sa dalan BS Aquino Drive, area sang Capitol Shopping Center, Brgy. Villamonte, Bacolod City.
Ginkilala ang security guard nga amo si Jose Postrana, 58 anyos ang edad, tumandok sang Sipalay City, security guard sa idalum sang JRY Security Agency kag assigned sa Bacolod Freedom Enterprises.
Nakilala naman ang tricycle driver nga si Jerry Nemenzo, 49 anyos ang edad, residente sang Purok Sabis, Brgy. Villamonte, Bacolod City.
Suno sa pahayag sang mga naka-kilala sa duha, ini sila ang may daan na nga tima-tima kag sang ila pagsugat-anay kaina sang aga, ini sila ang naglilisay nga nagresulta sang pagtiniruhay.
Ang gwardiya nag-angkon sang pilas sa iya tiyan kag abaga matapos nga gintiro sang tricycle driver kag ginabulong karon sa Bacolod Doctor’s Hospital samtang ang tricycle driver naman napilasan sa iya ulo tuga sang pag-lampos sang armas kag confined karon sa Corazon Locsin Montelibano Memorial Regional Hospital./dyHB BACOLOD
