Ha iya pagbisita, gin padangat ni Sen Villar an iya mga nahimo, programa ngan naipatuman na ha sulod han usa na katuig nga paglingkod niya kumo senador.
Usa na dinhi an bag-o la nga nagin balaod nga Maharlika Investment fund kun diin hi Villar an principal author ngan sponsor. Sumala ha iya, dako an maibubulig han MIF ha pag uswag han ekonomiya han Pilipinas, madugangan an pondo ha mga proyekto ha infrastraktura ngan makakaghatag hin trabaho ha mga Pilipino.
Padayon naman yana nga ginduduso han Senador kumo chairman han trade, commerce, and entrepreneurship, an One town, One product o OTOP, o an Senate Bill No. 1594 nga House Bill No. 1171, kun diin ine in nanunuyuan nga masuportahan an mga micro small and medium enterprises nga aada ha mga rural nga lugar.
Ine daw in makakabulig ilabi na ha local nga ekonomiya agud mas makilala, mapokosan ngan madevelop an mga produkto han mga tagsa-tagsa nga lugar. Ine gihapon daw in bentahi ha mga nagnenegosyo ngan makakagahatag gihapon hin trabaho.
An OTOP bill in naaprobahan na ha ika tulo nga pagbasa ha senado, mag aagi pa ha bicameral committee ngan kan Presidente Ferdinand Marcos.
Samtang, ha pagselebrar han senador han iya ika-45 nga kaadlawan, hiya in nagpasalamat ha tanan nga taga rehiyon otso ha pagsuporta ha iya mga programa. Hiya gihapon daw in naghihingyap nga umuswag pa an Pilipinas ngan mapaupay an kinabuhi han kada Pilipino.
