Davao City – Gipaboran sa usaka konsehal sa Unang Distrito sa dakbayan sa Davao ang sugyot nga dili na ipunon sa usa ka classroom ang mga estudyanteng babaye ug lalake aron masanta ang sayo nga pag uyab-uyab nila ug posibleng sayo nga pagmandos.
Sumala ni Association of Barangay Captains (ABC) President City Councilor Edgar Ibuyan, makatabang ang maong lakang aron makahuman gayod sa pagtungha ug matuman ang pangandoy ug damgo sa kinabuhi sa mga estudyanteng babaye ug lalake.
Una niini, na alarma na kaayo ang katawhan sa pagsaka sa ihap sa mga batan-ong babaye nga sayo nagburos tungod sa sayo sab nga pagdiskubre sa pakighilawas sa mga batan-ong lalake ug babaye nga dili pa unta angayan nilang buhaton butang nga dapat lang sa legal nga magtiayon.
Kung malahi ug dili na maipon sa usa ka kwarta sa eskwelahan ang mga lalake ug babayeng estudyante, may dakung purohan nga makalikay sila sa pagsulod sa gugma-gugma maingon sab sa pagtilaw sa kaibog sa unod.
Gumikan sa kapakyas sa mga ginikanan sa pagmonitor sa aktibidad sa ilang mga anak, hinungdan kini sa gidangatan sa mga batan-ong babaye nga sayo sila nagmab-dos ug nahimong inahan bisan og dili pa unta nila buot sudlan ang maong responsibilidad.
Gipangatarungan sa konsehal nga walay silbi ang pag-separar sa kwarto sa mga estudyanteng lalake ug mga babaye kun mismo ang mga ginikanan dunay pagkulang sa paggiya sa ilang mga anak.
Busa, kun aduna ma’y pasahan sa bug-at nga responsibilidad sa paggiya og sakto sa mga batan-on karon, kana walay lain kon dili ang mga ginikanan kay bisan pa og kapila lahion og classrooms ang lalake ug babaye apan kun gustohon gayod nila ang paghilawas dili gayod kini malikayan.
RadyoMaN Joel Viray
