South Cotabato- Patay ang usa ka Barangay tanod human kining gipusil sa wala pa mahilhing suspek atubangan mismo sa Teodoro P. Prudente National High School, nga nahimutang sa Purok 1, Barangay Simbo , Tupi, South Cotabato.
Biktima giilang si Ronald Aguelo Villanueva, 37-anyos, minyo, residente sa Purok 4 sa samang Barangay.
Nasayran nga nagbaktas ang biktima dihang gipusil kini sa duha ka suspek nga sakay sa motorsiklo nga hinungdan sa iyang kamatayon.
Human sa pagpamusil, paspas nga misibat ang mga suspek apan ila pang gipabuthan ang mga tawo nga anaa sa lugar. Swerti lang nga wala maigo.
Sa inisyal nga imbistigasyon sa kapulisan nasuta nga mukabat sa (11) ka mga basyo sa bala sa kalibre .45 nga armas ang narekober sa lugar. Sa karon padayon pang ginasuta sa kapulisan ang motibo sa maong krimen.
