Kalibo, Aklan – All set eon rong security preparations and requirements para sa Opening Salvo it Kalibo Sto. Niño Ati-atihan Festival 2019 sa maabot nga Biyernes, Oktubre 26.
Raya rong naging pahayag ni PSupt. Richard Mepania, hepe it Kalibo Police Station sa pakikipag-angot it RMN DYKR sa programang Straight-to-the-Point.
Suno kay Mepania nga kapin 100 ka police personnel rong iga deploy sa palibot kung Kalibo Pastrana Park, kaeakip eon rong SWAT ag mga taga Explosive Ordinance Division (EOD) nga maga check it area bago pa man rong programa.
Magbulig man sa pagmentinar it katawhay rong mga force multipliers nga ginakaeakipan it Kalibo Auxiliary Police (KAP) ag mga Barangay Tanod.
Sa nasambit nga aktibidad igabawae ro pagbaligya ag pagdaea it mga de bote nga ilimnun, mga bagay nga nakakasakit ag rong mga daeagko nga bag ag backpacks kamana man rong pagpanigarilyo sa publikong lugar.
Maga umpisa rong sad-sad ala 1:00 it hapon halin sa daywa ka starting point, una sa may Kalibo Magsaysay Park ag ro pangaywa hay halin sa may APSTA ag dueoeongan nga magapaadto sa Kalibo Pastrana Park para sa programa.
Iga presenter man dayon ro 16 ka mga candidate it Mutya it Kalibo 2019.
Samtang sa pihak nga parte, ginasaligan man ro pila ka mga turista nga halin sa isla it Boracay para nga maga side trip iya sa Kalibo bangud nga rong opening salvo hay kadungan ko pagbukas it Boracay.
Nagpadumdom man si Mepania sa mga pumueoyo nga magdahan sa andang mga daeang gamit para indi mabiktima it mga manakaw ag isarado it mayad ro panimaeay kon nagapanaw.
