Single motor mibangga sa nakaparadang truck, drayber ug angkas, patay

Patay na nga nadala sa balay tambalanan ang drayber ug angkas sa usa ka motorsiklo human nga aksidenteng nabanggaan niini ang nakaparadang elf pasado alas 9:30 sa kagabhion adtong Sabado didto sa Sayre Highway, Purok-6, Barangay Laguitas, Malaybalay City, Bukidnon.

Giila ang mga biktimang namatay nga silang James Obedencio, hingkod ang pangidaron, ulitawo, ug residente sa Purok-1, Barangay Simaya, Malaybalay City ug angkas niini nga si Jesrel Baysa, 25 anyos, ulitawo, ug residente sa Purok-9, Barangay Simaya.

Ang mga namatay sakay sa usa ka unit sa Honda CFT 125 single motor, nga mibangga ngadto sa usa ka Isuzu Tubular EXT truck nga gimaneho ni Salvador Linawan, 52 anyos, minyo, ug residente sa Purok-6, Barangay Panadtalan, Maramag, Bukidnon.

Sumala sa report sa kapulisan, nga nangihi matud pa ang drayber sa kilid nga bahin sa dalan hinungdan nga daklit kining mihunong sa maong lugar, apan sa wa damhang panghitabo, mibangga ngadto sa luyo nga bahin sa truck ang single motor nga nagdagan sa outer lane padulong sa south nga direksyon.

Gumikan sa maong pagbangga, nakaangkon og grabeng bun-og ug pangos sa kalawasan ang mga sakay sa single motor nga gisuwayan pa og dala sa balay-tambalanan apan gideklarang dead-on-arrival sa doctor ang duha sa tulo ka sakay niini.

Luwas ra usab ang laing angkas nga giilang si Leonard Nanol, 26 anyos, ulitawo, ug residente sa Balingasag, Misamis Oriental.

Temporaryong karong gidala sa Malaybalay City Traffic Management Center ang maong truck samtang nakustodiya sa kapulisan ning siyudad ang drayber sa truck samtang ginaandam ang kaso batok kaniya.

Facebook Comments