Kalibo, Aklan— Posible nga maitao eon ro social pension it mga senior citizen nga mabuhay eon nga ginahueat.
Raya ro ginpahayag it DSWD region 6 sa ginhiwat nga 17th regular session it Sangguniang Bayan it Kalibo kahapon.
Suno kay Ms. Judith Barredo PWD/SWD III Focal person it DSWD regional office 6 nga natapos eon ro andang validation sa listahan it mga benificiaries sa programa kung sa siin igatao eon sa mga raya ro social pension sa ikatlong domingo it Nobyembre apang ginklaru kara nga tentative pa eamang ro schedule ag pwedeng mabag-o.
Nabuhinan man ro mga senior citizen nga magabaton halin sa 5,907 hay naging 5,426 eonlang bangud ro iba hay ginbuoe sa listahan matapos madiskobrehan nga nagabaton man ro mga raya it pension halin sa SSS ag GSIS.
Ginbase ro nasambit nga tikang sa memorandum circular no. 4 o Omnibus Guidelines sa pagpanagtag it pension it taeatapan.
Sa bag-o nga sueondanan, igatao ro pension sa mga senior citizen kada semester ukon kada an-um nga buean .
Gindugang pa ni Barredo nga nagkaangkon it problema sa pondo ro taeatapan ku 2018 kung sa siin maabo nga mga LGUs ro naapektuhan kaeakip eon ro Kalibo.
