Magarbuhon nga giablihan kagahapong adlawa, adlaw nga Dominggo, ang usa ka semana nga SOCCSKSARGEN Regional Athletic Association kon SRAA Meet 2019 sulod sa Kiamba Sports Complex. Anaa sa sobra napulo ka libo (10k+) ka mga atleta, ginikanan, magtutudlo og mga local officials gikan sa entiro Rehiyon Dose ang nitambong gipangunahan mismo ni DepEd Undersecretary Annalyn Sevilla nga maoy gipadala ni DepEd Secretary Leonor Briones.
Personal nga nagpasalamat si Usec Sevilla og si DepEd Regional Director Allan Farnazo ngadto sa pamunuan ni Governor Steve Chiongbian Solon og sa tanang opisyales sa Sarangani Province hilabi na ang host municipalities nga mao ang MaKiMa area kon Maasim, Kiamba og Maitum, tungod sa malinawon og mainiton nga akomodasyon ngadto sa siyam (9) ka delegasyon nga gikan pa sa upat (4) ka probinsya og lima (5) ka syudad sa Region 12.
Si Usec Sevilla ang undersecretary sa finance, budget og performance monitoring nationwide sa DepEd og sya pud ang key spokesperson sa DepEd National, rason nga gawas sa iyang paghatag og inspirasyon sa mga atleta, iya pung gi-anunsyo kagahapon ang dagkong mga updates gikan sa DepEd.
Hilabihan ang pagpasalamat niini ngadto sa tanang katawhan sa pagsalig tungod kay basi sa resulta sa Social Weather Station o SWS Survey, nigawas nga ang Department of Education ang maoy pinakataas nga nakakuha og satisfaction rating sa tanang nasyonal nga ahensya sa gobyerno sa nakalabay nga tuig 2018.
