Davao City – Sa paglakat sa panahon, aduna gayuy motubo nga mga bag-ong syudad, lokalidad o mga sentro sa aktibidad ug operasyon sa pangagamhanan ingon man sa pribadong sektor.
Dili kana kalikayan sanglit ang mga karaang syudad malagmit man unya nga ma-saturate na sa development sama sa kaulohang Manila nga gipanagna nga mamahimo nang usaka extinct kun ‘dead city’ sa mosunod nga poco mas o menos 25 anyos.
Gani, kining grabeng traffic and transport gridlock sa Metro Manila pruweba lamang nga sobra na kini kaguot ug nga nahidangat na gayud ang ensaktong panahon diin seryoso natong tun-an asang dapita mamahimong sunod nga itikad haron pag-devolve kun pagpahalapad sa oportunidades sa pag-asenso sa tanang katawhan.
Maanindot nga panan-awon ang senaryong pagpabalhin kun pag-decongest sa kabisera gikan sa Manila paingon ngari sa probinsiya. Dili lamang Davao City kon dili maayo usab nga tun-an kun unsaon nga ang mga kanait nga kasyudaran sa Mindanao ug Kabisay-an nakatagamtam usab sa bunga sa kalamboan ilabi na sa natad sa ekonomiya, pamatigayon ug pagpangempleyo.
Apan dili lamang pulitikanhong transfer ang angay natong himoon: Angay usab nga i-establisar ang mga palisiya nga mag-engganyo sa mga dagkung negosyo, pabrika, planta, mga business and commercial establishments, mga multinational corporations, mga head offices sa mga pamatigayon, mga dagkung unibersidad, kolehiyo ug mga tunghaan haron mas lapad pa ang mamahimong kauswagan sa atong kaprobinsiyahan.
Ang devolution dili lamang diha sa political power: Ang pag-deconcentrate sa mga oportunidad ug kahigayunan angay usab nga mapatuman kun handom nato ang mas komprehensibong progreso sa atong katilingban.
RadyoMaN June Duterte
