Davao City – Unsa may atong palabihon: Trabaho abroad bisan kun arang kalisud ang kahimtang sa pangempleyo sama sa mga nasud nga Arabo pananglit Saudi, Kuwait ug uban pa?
O mas pili-on nato ang pag-estar na lamang dinhi sa atong yutang natawhan bahala na’g kasarangan lamang ang atong kahimtang basta kay luwas kita gikan sa pagpang-abusar makauban pa gayud nato ang atong mga mahal sa kinabuhi?
Kun ako ang pasulti-on, dili man tingali sala or dautan ang mangandoy o mangambisyon ug maayong ugma sa kinabuhi dili lamang alang sa atong tagsa-tagsa ka mga kaugalingon apan alang ilabi na sa progreso sa atong mga kaanakan.
Apan angay natong konsiderahon kun ang mao bang pangandoy dili ba usab mamahimong mitsa kun pabilo na hinoon sa pagka-disgrasya kun perdisyon sa mga nibiya aron manimpalad sa mas maayong kaugmaon.
Kay mag-unsa man ang tanang dolyar, dinar, yen, rubbles, euro or yuan nga mamahimong mapadala ngari kanato sa atong mga OFWs kun ang bugti man usab niini mao ang physical and sexual abuse, racial and gender discrimination, kawalay respeto, rape, homicide ug uban pang matang sa pagmaltratar kanato sa mga mangtas nga rasang langyaw kinsa tan-aw nila kanato ilang mga slaves kun ulipon kinsa mamahimong bentahaan sa tanang butang.
Gitahud nako ang atong indibidwal nga desisyon sama sa pag-abroad – inyo pud na, wala ‘tay lalis dihang dapita – ang ako lang, mag-unsa na lang kaha ang mahibilin nga mga miyembro sa pamilya: Mga anak kinsa magdaku nga walay hustong giya gikan sa mga ginikanan taliwala sa gubot nga kalibutan.
Mabayran ba sa dollar remittances ang bati-ong tumang kamingaw matag adlaw’ng tanan, homesickness ug kakulang sa proteksyon ug seguridad sa mga trabahanteng Pinoy didto sa malagyo nga mga dapit sa kalibutan?
Suma total, mas nakaayo o naka-alibyo ba sa nasud ug sa atong kinabuhing personal ang paglalin abroad sa atong mga kababayan in search for a much better life?
Ikaw, bay unsay imong opinyon niini?
RadyoMaN June Duterte
